Леанід Краўчук: Расеяй кіруе не Пуцін ці Мядзьведзеў, а палітбюро

Расеяй кіруе група людзей, а не асабіста прэм'ер Уладзімір Пуцін або прэзыдэнт Дзьмітры Мядзьведзеў. Такое меркаваньне выказаў першы прэзыдэнт Украіны Леанід Краўчук у эфіры ўкраінскага Першага нацыянальнага канала на праграме “Шустэр Live” 30 верасьня 2011.

“У Расеі склалася сытуацыя, калі кіруе не адзін ці два чалавекі, а група людзей. Ні Пуцін, ні Мядзьведзеў самі не вызначаюць стратэгіі Расеі і будучых адносін у сьвеце. Там вызначае група людзей”, – адзначыў Краўчук.

Першы прэзыдэнт Украіны Леанід Краўчук

“Я калісь, такое параўнаньне, быў у Лібіі. Калі сустрэўся з Кадафі, ён прадставіў сваю каманду – пяць чалавек, членаў палітбюро, і сказаў: вось гэтыя кіруюць краінай”, – прыгадаў палітык.

“Расея пакуль ня вызначыла прозьвішчаў, але тое, што гэта не асабіста Пуцін ці Мядзьведзеў – гэта рэальны факт”, – падкрэсьліў Краўчук. “І таму як бы не зьмяняліся галовы на расейскім арле, яны будуць праводзіць адну і тую ж палітыку. Ілюзія, што хтось будзе лепшым расейскім прэзыдэнтам, а хтось горшым – гэта памылка”, – сказаў першы прэзыдэнт Украіны.

Такім чынам, паводле яго слоў, памылковымі зьяўляюцца спробы наладзіць добрыя адносіны з Расеяй на ўзроўні асабістага сяброўства паміж кіраўнікамі дзяржаў, бо гэтымі адносінамі кіруюць не асобы, а інтарэсы.

“Расея будзе такой, якой яна ёсьць. Мы павінны быць Украінай і абараняць свае нацыянальныя інтарэсы”, – падкрэсьліў экс-прэзыдэнт.

 

Таксама рэкамэндуем Вашай увазе нядаўні артыкул Джэфры Найквіста:

Расеяй кіруе таемнае палітбюро?