Зварот да беларускай рэдакцыі Радыё Свабода

Паважаная рэдакцыя “Радыё Свабода”! Я зьяўляюся сталым чытачом вашага вэб-сайта і часам пакідаю камэнтары пад нікнэймам “Абаронім Беларусь”. Зьвярнуцца з адкрытым лістом на ваш адрас мяне вымусіла сыстэматычнае парушэньне з вашага боку прынцыпу бесстароннасьці, закладзенага ў Прафэсійны кодэкс журналіста Радыё Свабода:

Юлія Цімашэнка і цэнзура на Радыё Свабода

3–4 красавіка на сайце беларускай рэдакцыі Радыё Свабода тройчы ўзгадавалася імя Юліі Цімашэнкі. З жалем можна канстатаваць, што асьвятленьне падзеяў вакол украінскага экс-прэм'ера у беларускіх незалежных СМІ даволі аднабокае і амаль цалкам укладваецца ў схему: “Януковіч – дыктатар, Цімашэнка – бязьвінная ахвяра і палітычны вязень”. Пад гэтую схему бяруцца інтэрвію ў пэўных палітолягаў, якія тлумачаць беларусам, што ўкраінскі прэзыдэнт ідзе па шляху Лукашэнкі. Пры гэтым замоўчваюцца шакіруючыя факты, якія цалкам руйнуюць створаны СМІ прывабны вобраз “лэдзі Ю”. Артыкул “Кіеву выгадна, калі б Цімашэнка стала ўцякачкай” таксама не вызначаўся арыгінальнасьцю і ўсяляк падкрэсьліваў палітычныя аспэкты праблемы, старанна абмінаючы прававыя. Каб запоўніць гэты прабел, я вырашыў зрабіць адпаведны камэнтар. І вось тут пачалося самае цікавае. Ён не зьявіўся! Чым жа мой камэнтар так напалохаў незалежную радыёстанцыю, якая ўтрымліваецца на грошы амэрыканскіх падаткаплатнікаў?

Віктар Юшчанка: Цімашэнка падвяла Ўкраіну да банкруцтва

Экс-прэм'ер і лідэр партыі “Бацькаўшчына” Юлія Цімашэнка падвяла краіну да банкруцтва дзякуючы заключэньню газавых кантрактаў з Расеяй у 2009 годзе. Аб гэтым паведаміў былы прэзыдэнт Украіны Віктар Юшчанка ў прамым эфіры праграмы “Шустэр live”. Паводле яго слоў газавыя дамовы ўрада Цімашэнкі – гэта палітыка, а не матэматыка. Экс-прэзыдэнт растлумачыў, што цана на газ для Ўкраіны мусіла быць амаль у 2,5 разы ніжэй. Такім чынам, Юшчанка ацэньвае газавае пагадненьне, заключанае з удзелам Цімашэнкі, як “бомбу”, закладзеную пад сувэрэнітэт Украіны.